GAON-NAMUNA-1 गाव नमुने

गाव नमुने

'गाव नमुना म्हणजे काय व तो कसा मिळवावा?' या प्रश्नाच्या अनुषंगाने खालील माहिती आपणास पुरवीत आहोत-महाराष्ट्र जमीन महसूल अधिनियम 1966 (महा. लॅण्ड रेव्हेन्यू कोड) अन्वये प्रत्येक गावातील जमिनीची कागदपत्रे ही त्या गावातील तलाठी कार्यालयात असतात, नोंदी असतात. जमीन महसूल कायद्यान्वये जमिनीच्या तलाठी दप्तरामध्ये अनेक प्रकारच्या नोंदवह्या असतात. तलाठी दप्तर नमुना नंबर 1 ते 21 गाव नमुन्यांमध्ये असते. या नोंदवहीस वेगवेगळा अर्थ असतो.

आपणास आवश्‍यक असलेली माहिती कोणत्या नोंदवहीत असते याबाबत ही माहिती.

* गाव नमुना नंबर - 1 - या नोंदवहीमध्ये भूमी अभिलेख खात्याकडून आकारबंध केलेला असतो, ज्यामध्ये जमिनीचे गट नंबर, सर्व्हे नंबर दर्शविलेले असतात व जमिनीचा आकार (ऍसेसमेंट) बाबतती माहिती असते.

* गाव नमुना नंबर - 1अ - या नोंदवहीमध्ये वन जमिनीची माहिती मिळते. गावातील वन विभागातील गट कोणते हे समजते. तशी नोंद या वहीत असते.

* गाव नमुना नंबर - 1ब - या नोंदवहीमध्ये सरकारच्या मालकीच्या जमिनीची माहिती मिळते.

* गाव नमुना नंबर - 1क - या नोंदवहीमध्ये कुळ कायदा, पुनर्वसन कायदा, सिलिंग कायद्यानुसार भोगवटादार यांना दिलेल्या जमिनी याबाबतची माहिती असते. सातबाराच्या उताऱ्यामध्ये नवीन शर्त असल्यास जमीन कोणत्या ना कोणत्या तरी पुनर्वसन कायद्याखाली किंवा वतनाखाली मिळालेली जमीन आहे असे ठरविता येते.

* गाव नमुना नंबर - 1ड - या नोंदवहीमध्ये कुळवहिवाट कायदा अथवा सिलिंग कायद्यानुसार अतिरिक्त जमिनी, त्यांचे सर्व्हे नंबर व गट नंबर याबाबतची माहिती मिळते.

* गाव नमुना नंबर - 1इ - या नोंदवहीमध्ये गावातील जमिनींवरील अतिक्रमण व त्याबाबतची कार्यवाही ही माहिती मिळते.

* गाव नमुना नंबर - 2 - या नोंदवहीमध्ये गावातील सर्व बिनशेती (अकृषिक) जमिनींची माहिती मिळते.

* गाव नमुना नंबर - 3 - या नोंदवहीत दुमला जमिनींची नोंद मिळते. म्हणजेच देवस्थानासाठीची नोंद पाहता येते.

* गाव नमुना नंबर - 4 - या नोंदवहीमध्ये गावातील जमिनीचा महसूल, वसुली, विलंब शुल्क याबाबतची माहिती मिळते.

* गाव नमुना नंबर - 5 - या नोंदवहीत गावाचे एकूण क्षेत्रफळ, गावाचा महसूल, जिल्हा परिषदेचे कर याबाबतची माहिती मिळते.

* गाव नमुना नंबर - 6 - (हक्काचे पत्रक किंवा फेरफार) या नोंदवहीमध्ये जमिनीच्या व्यवहारांची माहिती, तसेच खरेदीची रक्कम, तारीख व कोणत्या नोंदणी कार्यालयात दस्त झाला याची माहिती मिळते.

* गाव नमुना नंबर - 6अ - या नोंदवहीमध्ये फेरफारास (म्युटेशन) हरकत घेतली असल्यास त्याची तक्रार व चौकशी अधिकाऱ्यांचा निर्णय याबाबतची माहिती मिळते.

* गाव नमुना नंबर - 6क - या नोंदवहीमध्ये वारस नोंदीची माहिती मिळते.

* गाव नमुना नंबर - 6ड - या नोंदवहीमध्ये जमिनीचे पोटहिस्से, तसेच वाटणी किंवा भूमी संपादन याबाबतची माहिती मिळते.

* गाव नमुना नंबर - 7 - (7/12 उतारा) या नोंदवहीमध्ये जमीन मालकाचे नाव, क्षेत्र, सर्व्हे नंबर, हिस्सा नंबर, गट नंबर, पोट खराबा, आकार, इतर बाबतीची माहिती मिळते.

* गाव नमुना नंबर - 7अ - या नोंदवहीमध्ये कुळ वहिवाटीबाबतची माहिती मिळते. उदा. कुळाचे नाव, आकारलेला कर व खंड याबाबतची माहिती मिळते.

* गाव नमुना नंबर - 8अ - या नोंदवहीत जमिनीची नोंद, सर्व्हे नंबर, आपल्या नावावरील क्षेत्र व इतर माहिती मिळते.

* गाव नमुना नंबर - 8ब, क व ड - या नोंदवहीमध्ये गावातील जमिनीच्या महसूल वसुलीची माहिती मिळते.

* गाव नमुना नंबर - 9अ - या नोंदवहीत शासनाला दिलेल्या पावत्यांची माहिती मिळते.

* गाव नमुना नंबर - 10 - या नोंदवहीमध्ये गावातील जमिनीच्या जमा झालेल्या महसुलाची माहिती मिळते.

* गाव नमुना नंबर - 11 - या नोंदवहीत प्रत्येक गटामध्ये सर्व्हे नंबर, पीकपाणी व झाडांची माहिती मिळते.

* गाव नमुना नंबर - 12 व 15 - या नोंदवहीमध्ये पिकाखालील क्षेत्र, पडीक क्षेत्र, पाण्याची व्यवस्था व इतर बाबतीची माहिती मिळते.

* गाव नमुना नंबर - 13 - या नोंदवहीमध्ये गावाची लोकसंख्या व गावातील जनावरे याबाबतची माहिती मिळते.

* गाव नमुना नंबर - 14 - या नोंदवहीमध्ये गावाच्या पाणीपुरवठ्याबाबतची माहिती, तसेच वापरली जाणारी साधने याबाबतची माहिती मिळते.

* गाव नमुना नंबर - 16 - या नोंदवहीमध्ये माहिती पुस्तके, शासकीय आदेश व नवीन नियमावली याबाबतची माहिती मिळते.

* गाव नमुना नंबर - 17 - या नोंदवहीमध्ये महसूल आकारणी याबाबतची माहिती मिळते.

* गाव नमुना नंबर - 18 - या नोंदवहीमध्ये सर्कल ऑफिस, मंडल अधिकारी यांच्या पत्रव्यवहाराची माहिती असते.

* गाव नमुना नंबर - 19 - या नोंदवहीमध्ये सरकारी मालमत्तेबाबतची माहिती मिळते.

* गाव नमुना नंबर - 20 - पोस्ट तिकिटांची नोंद याबाबतची माहिती मिळते.

* गाव नमुना नंबर - 21 - या नोंदवहीमध्ये सर्कल यांनी केलेल्या कामाची दैनंदिन नोंद याबाबतची माहिती मिळते.

अशा प्रकारे तलाठी कार्यालयात सामान्य नागरिकांना गाव कामगार तलाठी यांच्याकडून वरील माहिती विचारणा केल्यास मिळू शकते. आपणास आपल्या मिळकतीबाबत व गावाच्या मिळकतीबाबत माहिती मिळाल्यामुळे मिळकतीच्या मालकी व वहिवाटीसंबंधीचे वाद कमी होण्यास व मिटण्यास मदत होऊ शकते असे वाटते.

अनुक्रमांक	गाव नमुना	विवरण
१	एक	जमिनीची नोंदवही (आकारबंद जमाबंदी मिस्ल-शेतवारपत्रक)
२	एक - अ	वन जमिनीची नोंद वही
३	एक -ब	बिन भोगवटयाच्या (सरकारी) वन जमिनीची नोंद वही
४	एक -क	भोगवटदार वर्ग दोन म्हणून मंजूर केलेल्या जमिनी आणि ग्रामपंचायतीकडे निहीत केलेल्या जमिनी यांची नोंद वही
५	एक - ड	कुळ वहिवाट कायदा आणि महाराष्ट्र शेत जमीन ( जमीन धारणेच्या कमाल मर्यादा ) अधिनियम, १९६१ यांच्या उप बंधानुसार अतिरिक्त म्हणून घोषित केलेल्या जमिनी दर्शविणारी नोंद वही
६	एक - इ	अतिक्रमण नोंद वही
७	दोन	अकृषिक महसुलांची नोंदवही
८	तीन	दुमाला जमिनीची नोंद वही
९	चार	संकीर्ण जमीन महसुलाची नोंदवही (सिवाई आमदनी--सिवाई जमावबंदी)
१०	पाच	क्षेत्र आणि महसूल यांचा सर्वसाधारण गोषवारा ( ठरावबंद-किस्ताबंदी खतावणी-जमाबंदी पत्रक)
११	सहा	फेरफारांची नोंद वही
१२	सहा - अ	विवादग्रस्त प्रकरणांची नोंदवही
१३	सहा - ब	प्रकरणांची नोंदवही
१४	सहा - क	वारसा प्रकरणांची नोंदवही
१५	सहा - ड	नवीन उप विभाग ( पोट हिस्से) नोंदवही
१६	सात, ७ अ, १२	गाव नमुना सात, सात अ व बारा
१७	सात अ	कुळ वहिवाट नोंदवही
१८	सात ब	अधिकार अभिलेखानुसार जमीन कब्ज्जात असल्याचे मानण्यात येणाऱ्या व्यक्ती व्यतिरिक्त जमीन कब्ज्जात असलेल्या इतर व्यक्तींची नोंदवही
१९	आठ - अ	धारण जमिनीची नोंदवही
२०	आठ - ब	ठराव बंदातील सव: बाबींचे येणे व वसुली चे पत्रक
२१	आठ - क	मागण्या व वसुली यांच्या खातेवाही आणि जमीन महसुलाखेरीज इतर बाबी ( उदा. बांधबंदिस्तीविषयक येणे रकमांव्यतिरिक्त पाटबंधारे विषयक येणे रकमा, पोट-हिस्सा भूमापण फी, विक्रीकर, आयकर इ.) यांचा चाचणी ताळेबंद यांची नोंदवही
२२	आठ - ड	तलाठ्याने / मंडल निरीक्षकाने वसूल केलेल्या सरकारी येणे रकमांची व इतर रकमांची रोख नोंदवही
२३	नऊ	दैनिक व जमा पुस्तक
२४	नऊ - अ	शासनाला प्रदान केलेक्या रकमांच्या पावत्या
२५	नऊ - ब	तलाठ्याने ठेवावयाची गाव नमुना नऊची पावती पुस्तके व इतर यांच्या संग्रहाची नोंद वही
२७	अकरा	(पिकाची आकडेवारी)
२८	तेरा	लोकसंख्या, गुरे व शेतकी अवजारे दर्शविणारी नोंदवही
२९	चौदा	पाणी पुरवठ्याच्या नोंद वही
३०	पंधरा	आवक जावक नोंदवही
३२	सतरा	प्रकरण प्रतिवृत्त
३३	अठरा	आवक-जावक नोंदवही मंडल निरीक्षक/मंडल अधिकारी यासाठी
३४	एकोणीस	तलाठी / मंडळ निरीक्षक / मंडळ अधिकारी यांच्या ताब्यात असलेल्या सरकारी मालमत्तेची नोंदवही
३५	वीस	तलाठी / मंडळ अधिकारी यांच्या करिता पोष्टाच्या सरकारी तिकिटांची नोंद वही
३६	एकवीस	मंडल निरीक्षक / मंडल अधिकारी यांची मासिक दैनंदिनी

SHARE THIS